Veer sjtèlle jeugprins Tygo II en zien adjudante Bram en Quin aan uch veur:
Tygo Hensen
Tygo is de oudste zoon van Davy en Marloes Hensen. Heer is de broor van Quinn, dae dit carnevalsjaor ziene adjudant maog zeen. Zien auwersj waore pinsepaar in 2019 van CV de Kuutebieters. Tygo haet ut wie ze dat zègke “mèt de paplepel ingegote” gekrege. Dus dat kump gans good mèt de carneval dit jaor. Tygo is eine ondernummende jong en altied bezig mèt vanalles en nog get. Heer deit gaere dinger boewe en vanalles make. Auch boetesjpele mèt vrung vink heer geweldig um te doon. Leuke dinger doon mèt ut gezin vink heer auch hjèl leuk. En natuurlik game is get wha ‘r ziene vrieje tied mèt vol krieg. Ut allerleukste vink heer keepe en dat deit heer bie de JO11 van RKUVC. Balle tegehouwe kint heer es de bèste. Mèt de carneval löp heer al vanaaf zien ièrste levensjaor mèt in de optoch bie Familie Doorrein. Eine vriende groep van zien pap en mam, die altied prachtige carnevalswages boewe. Doordat heer dit al van kleins af aan mèt haet gekrege vink heer auch alle carenvalsmeziek prachtig um te hwèrre. Kortum ein druk bezig baasje dae de carneval TOP vink. En dat deit heer neet allein, mhè same mèt zien adjudante Bram en Quinn.
Bram Duijkers
Bram is eine gooje vrund van Tygo. Neet verniks dat Tygo häöm gevraog haet ziene adjudant te zeen. Bram is zoon van Marco en Wendy Duijkers en haet ut carnevalsblood van de mam mètgekrege. Heer zelf hilt van luu en gezelligheid um zich heen. Auch carnevalsmeziek vink heer gewelidig en drèjt dat ut ganse jaor door. Sinds ein paar jaor geit heer mèt mam in ein grupke mèt in de optoch, “de Rwad-geel-greun-gekke”. Optochlaupe vink heer dan auch sjiek um te doon. Heer haet auch flink get hobbies: voetballe, game, scouting en fietse deit heer gaere. Dus de combinatie met Tygo dit jaor kump gans good mèt de carneval in Ulesjtraote.
Quinn Hensen
Quinn, de jongste zoon van Davy en Marloes en ut breurke van Tygo. Wie biezonder is ut dat de breurs same dit carnevalsjaor veurop goon mèt de carneval in Ulesjtraote. Quinn is eine sjpontane en vrolikke jong. Heer hilt hjèl erg väöl van voetballe! Heer haet dan auch ein grwat veurbeeld, ziene pap, dae mèt zien 42 jaor nog sjteeds vol euvergave bie RKUVC 1 voetbalt. Sjpèlkes spele mèt ut gezin of vrung en game vink heer super um te doon. Rondum de carneval vink heer ut leuk om mèt te boewe aan de carnevalswage van familie Doorrein. Auch mèt te laupe in de optoch deiste häöm ein grwat plezeer mèt. Vanaaf zien geboorte löp heer d’n optoch in Ulesjtraote en Meersje mèt. Zien favoriete carnevalsartieste zeen John Tana en os plaatselikke helde Max & Remco. Auch bie Quinn zit ut carnevalle mèt os alle dr zeker in.
Dit jaor goon zie door ut leve es:
Jeugprins Tygo II
Adjudant Bram
Adjudant Quinn