Veer sjtèlle uch ut prinsepaar van CV de Kuutebieters 2025 veur.
Danny Seuren
Danny is gebore op 14 december 1991 in Ulestjraote. In zien prinsejaor is heer 3×11 jaor. Heer is opgegreujd in os Kuutebietersriek en kump oet ein gezin van 2. Danny is ut breurke van Daisy. Wie heer 5 jaor waor begoste zien auwersj mèt café de Walk-Inn op Grwat Berghem. Wha zien mam nog sjteeds de de tapkraan bedeend. Danny haet van achter de bar de carneval in Ulesjtraote mèt gekrege. Heer begos mèt glaze sjpeule en greujde oet nao eine echte all-rounder van wat zich aafsjpaelt in ein kroeg. Dao zulle ze häöm dit carnevalsseizoen goon misse. Heer werk es registeraccountant en is sjus in dees 7 carnevalsweke neet te misse bie zien werk. Mhè prins zin in ut Kuutebietersriek maaks ste mhèr ins mèt en dao zulle ze rekening d’r mèt motte houwe dat heer waal ins get uurkes geit misse. In de vrieje tied haet heer same mèt ziene pap en vriendin ein eige hoes geboewt. Hilt heer van lekker oetete goon en is vare mèt ziene bwat sjwanne tiedvulling. Auch deit Danny al väöle jaore vriewilligerswerk en hulp heer die prachtige stichting UK’98 bie hun activiteite. Wha heer zien kwaliteite mèt dat deenblaad en zien vaardighede mèt die tapkraan ljèt zeen. Nao zien oetroping heit heer al laote weite, “Ich weur neet de èjrste prins dae zien eige beer geit hole”.
Anouk Offermanns
Anouk is gebore op 19 september 1992 in ut ziekehoes in Gelean. Häör auwwersj woonde toen in os Kuutebietersriek, zie is einigskind. Mam kump van Rothem en pap van Bung. Logisch datste dan in Ulesjtraote terecht kumps. In häör derde levensjaor verhuusde zie nao Bung wha zie wiejer opgegreujd is tot häör 29ste jaor. Noe woont ze same mèt Danny in hun zelf geboewd hoes in Ulesjtraote. Anouk werrik es klantmanager Facilitair Bedrief bie Sevagram. Dao is zie verantwoordelijk veur de facilitaire aafdeilinge van 11 verpleeghoeze en hospices. Zie sjteit häör menneke dus waal. Same mèt häöre prins haet zie klusse in en um hun zelfgebouwd hoes tot hobbie gemaak. Anouk is de lètste jaore mèt de carneval bekind es ein van de Uulekukes die de dameszitting al flink get jaore in Ulesjtraote organisere. Dao lèt ze op de cente die binnekomme en aan ’t jaorlikse sjieke programma weure oetgegeve. Ze is wiejer leefhöbber van ut Bourgondische dat Limburg te beeje heat en veural oetete en/of get drinke mèt vrung en femilie is ze altied waal veur te vinge. Carneval viere haet ze veural van Danny mètgekrege, auch ut in t café werke mèt de carneval. Zie höbbe jaorelank mèt eine groep carnevalswages geboewd en optochte gelaupe. Hiej is dat vlèmke en de leefde veur de carneval gekomme en zit dr good in.
Same genete zie van hun zelf geboewd hoes op ein sjwan plek aan de rand van Ulesjtraote vekansies, scootertochte make door ut sjwane Limburg, genete van op sjtap goon mèt hunne vriendegroep “de Boerebond en Boerebondinne”. En noe goon ze volop genete van al ut schwans dat de carneval in Ulesjtraote te beeje haet.
Neet gewoon es Danny en Anouk, mhè zie zulle door ut leve goon es
Prins Danny II en prinses Anouk
Es prinsepaar van CV de Kuutebieters
