Nuuj persentatore Kingerzitting
Veer sjtèlle uch veur aan os nuuj persentatore van os Kingerzitting.
Nao jaore wha, Linda en Nicole de Kingerzitting mèt väöl enthousiasme presenteerde,
waor veur hun de Kingerzitting 2025 de lètste.
Al vlot heije veer 2 nuuj enthousiaste dames die dat sjtökske waal wille euvernumme.
Joëll Gardeniers en Joëlle Kerkhoffs. Zie sjtèlle zich zelf aan uch veur.
Joëlle Kerkhoffs
Leef Kuutebieters en Kuutebieterinnekes,
Via dizze weeg wil ich michzelf even veursjtille aan uch. Ich bin Joëlle Kerkhoffs, ein gebore Carnevalist.
Vanaaf dit carnevalsseizoen zal ich, same mit Joëll Gardeniers, de Kingerzitting in Ulesjtraote goon presentere.
Vreuger, wie ich zelf nog op de basissjwal zaot, höb ich gein jaor euvergesjlage.
Ich waor elk jaor te vinge op ’t podium mit ein gruupke, mit mien zusje of allein.
Ich begos altied op tied mit ‘t insjtudere van alle danspèskes en kos neet wachte um op ‘t podium te sjtoon.
Noe sjtaon ich te poppele um wir dat podium op te goon.
Deze kjèr neet um zelf ein optreeje te geve, mhè um veur uch de Kingerzitting te presentere en
d’r same ein onvergetelikke daag van te make. Ich kiek d’r al nao oet en hopelik geer auch.
Tot zondig 11 jannewari 2026 op de bühne of in de zaal!
Alaaf Joëlle
Joëll Gardeniers
Hoi allemaol!
Ich bèn Joëll Gardeniers en vanaaf kommend jaor zal ich,
same mit Joëlle Kerkhoffs, de Kingerzitting goon presentere!
Es klein maedje en éch Kuutebieterinneke sjting ich eeder jaor op datzelfde podium.
Altied live zinge, carnevalsmeziek en dèks same mit miene carnevalsvrund Noah.
De aanloup en ut oefene waor al ein fjèske op zich.
En dan de gezonde sjpanning op de daag zelf en ut verkleije, dat maakte ut ech biezonder.
Daorum veult ut extra sjpeciaal um noe, in ’n nuuj rol es presentatrice,
wir trök op dat podium te maoge sjtoon mèt de Kingerzitting!
De Kingerzitting beejt kinger de kans um zichzelf te laote zeen en wjèrre,
op ein ljegdrempelige en gezellige meneer. Alles kint en niks is te gek.
Dat is get woo ich es juf én lid van de fanfaar en Kuutekapel natuurlik allein mhèr achter sjtaon.
Ich höb d’r ontzettend väöl zin in en maak d’r gear same mit uch ein gezellige Kingerzitting van!
Tot zondig 11 januari!
Alaaf Joëll
