Veer sjtèlle uch veur aan os prinsepaar 2026
prins Roel II en prinses Astrid
Prins Roel II (Roel Lacroix)
Wha gebore en opgegreujd?
Gebore op 13 juli 1968 in Beek. Wha heer neet lang gebleve is. Ze verhuusde wie Roel 1 jaor waor nao Nirbeek en is dao opgegreujd. Ut gezin besjtong oet 5 kinger, 4 jonges en ein maedje. Whavan Roel de jongste is. Helaas zin al eine lange tied geleeje mam Lies, febrewari 1995 en pap Wiel, jannewarie 2005 euverleeje. Roel haet nog 2 auwere breurs Jack en Paul. Broor Jos is gesjtorve in augustus 2009 en zus Inge in september 2015.
Wat deit Roel veur ein werk en haet heer hobbies?
Roel werk es mètwerkend veurman-technisch leidinggevende bie ein technisch onderhoudsbedrief op Chemelot, Bilfinger. Wha heer bienao dageliks op ziene fiets trouw nao toe geit.
Roel is leider bie de veterane van RKUVC. Veurheen zelf auch nog es sjpeler, mhè dat ljèt heer noe lever euver aan de jongere auwere. Heer vlag op ziene tied en nump waal ins de leiding.
Heer haet zien hart ligke bie hunne vriendegroep en auch carnevalsgroep CV d’n Import. Dao is heer bienao dageliks mèt bezig. Dao is heer veur vanalles en nog get te vinge, mhè ut sjiekste vingk heer leedsjes sjrieve en zinge en ut boewe aan hunne carnevalswage. Roel kiek auch gaere voetbal.
Met ut klusse in de weuning van Julian haet heer eine nuuje hobbie gevonge.
Same mèt Astrid ging heer vreuger skië. Noe geit heer lekker wandele mèt Kaya, oetete, ein terassje pakke, op sjtap mèt de vrung, same op vekansie goon en genete van hun gezin.
Kump heer oet ein carnevalsfemilie?
Roel kump oet ein echte carnevalsfemilie. Wha beginne vr…..
Ziene pap, Wiel, waor 3×11 jaor lid van CV de Doorzetters Nirbeek, wha heer de “Orde van verdeenste” veur ontvange heat. Ziene broor Jack waor van diezelfde CV de Doorzetters jaorelangk Vors. Broor Jos is bie CV de Doorzetters jeugprins gewaes. Dat waor allemaol in Nirbeek. Mhè auch in Ulesjtraote haet Roel femilie in de carnevalshistorie en neet de minste.
Tant Fieny en nonk Hub Jacobs, ut ièrste prinsepaar van CV de Kuutebieters. Neaf Stan Jacobs prins 1991 bie de Kuutebieters. Dan auch nog naef Ralf Jacobs dae in 1979 jeugprins waor, toen same mèt grwatte prins Henk Kuypers. En es dat nog neet genog is, haet heer auch nog femilie die in Beak bie de Pöttentoate prins zien geweas. Naef Roland es prins en ziene zoon waor dao jeugprins.
Wauw…. Dao kos prins Roel II toch neet achterblieve.
Zelf is Roel Captain (prins) gewaes bie carnevalsgroep CV d’n Import. Zie zègke zelf dat ze es ‘import’ van Ulesjtraote weinig kans make um prins bie CV de Kuutebieters te weure. Dus rope zie eeder jaor zelf eine hwaglustigheid/heerser oet. Roel waor in 2015 Captain.
Noe Roel es Prins Roel II van CV de Kuutebieters door ut leve geit, zal CV d’n Import de teks op hun site wellich motte aanpasse……
Wie en van wae haet heer de carneval mètgekrege?
Wha ste opgreujs viers ste gebruukelik auch de carneval, dat waor veur Roel dus in Nirbeek. Zwa gaove pap en mam hun kinger dat mèt. Wie heer auwer waor ging heer mèt zien jeugvrung nao Sjömmert. Heer waor mèt carneval auch waal ins DJ in ut gemeinsjapshoes van Nirbeek, dat waore leuke tieje. Tegewoordig viere Roel en Astrid de carneval same mèt hun vrung van Cv d’n Import m.n. in Ulesjtraote en Meersje. Dao loupe ze mèt in de grwatte optoch. In de begin jaore van CV d’n Import lepe ze auch nog waal ins mèt in de kingeroptoch. Auch de Top111 in Meersje weurt door hun bezoch. Ze zörge dr altied veur dat ze op tied in de Notenbalk zeen veur de carnevalsaafsjleeting van de Kuutebieters. Zie kriege dr nwats genog van, want zie zin auch vaste klant op ut hièrringbiete.
Prinses Astrid (Astrid Lacroix-Diederen)
Wha gebore en opgegreujd?
Gebore 5 augustus 1970 in Ulesjtraote en hie auch opgegreujd. Astrid is ein ech Kuutebietersmaedje. Mam houw vreuger in de garage häöre wolbotiek, wellich nog waal bekind bie väöle. Pap, Paul, woont mèt ziene partner in Beek. Zie zeen mèt hun drieje in gezin Diederen. Wha Astrid de middelste van die drie is. Zie haet nog ein auwere zus Ilse en broor Peter.
Welk werk en hobbies haet Astrid?
Astrid werk al 36 jaor es apothekersassistente in de Apotheek van Bung. Af en toe waor ze te vinge in de apotheek van Ulesjtraote (toen die dr nog waor).
Gans vreuger zaot Astrid bie ut Maedjesjeugwerk Ulesjtraote, wha zie eine feine tied haet gehad. Auch probeerde ze ins bugel te sjpele bie Fanfare Concordia, mhè dat waor gein succes. Astrid haet ballet geprobeerd en bie ein jongerekwar gezonge.
Noe sjport ze in Bung en is auch veur häör CV d’n Import eine grwatte hobbie.
Wiejer geit ze gaere shoppe en lekker urges get ete en drinke mèt vriendinne en vingk ze op ziene tied ein terasje pakke hjèl leuk.
Haet Astrid auch zwa ein grwatte carnevalsfemilie?
Astrid haet in tegesjtèlling tot Roel minder femilie in de carnevalshistorie, mhè kin waal zègke dat häör opa en oma de Jong ooit ut Bejaardeprinsepaar in Avé Maria zin gewaes.
Same mèt hunne vriende-carnevalsgroep CV d’n Import goon zie eine te gekke carneval tegemoet en zulle vr mèt os alle van hun goon genete es Prinsepaar 2026.
Wha höbbe zie zich ljèrre kinne en wie is ut verlaup van hun relatie?
Op carnevalsmaondig 2 maart 1987 ljèrde Roel Astrid kinne. In ut toen welbekinde gemeinsjapshoes van Sjömmert. Ut waor metein raak. In 1993 zin ze goon samewone, hun ièrste weunig waor in de Burg. Visscherssjtraot. In 2009 verhuusde ze nao de Churchillsjtraot, noe neet hun woonhoes mhè hun prinselik palies. Nao 10 jaor ein relatie te höbbe, besjlote ze te trouwe, dat gebäörde op 16 mei 1997.
Same höbbe ze 2 jonges. Julian gebore in ut carnevalswiekend van 2001. Roel deilde toen vol trots op zien geboorte besjuut mèt muuskes aan de optochdeilnummersj oet! Julian woont nog toes, mhè is al eine lange tied bezig um zien eige hoes nao ziene wunsj te verboewe. Um dao te goon samewone mèt zien vriendin Laura. Hunne zoon Michèl haet Ulesjtraote verlaote en woont same mèt ziene vrund Randy in Heer Mesjtreech. Wiejer besjteit ut gezin oet hunne trouwe vrund, hond Kaya, eine Golden Retriever van 4 jaor auwt.
