Ich bin Tim Rousseau, gebore in ut ziekehoes van Mesjtreech en opgegreujd in ut swjanne Ulesjtraote! Es eine Tempelaer gebore, mhè eine Kuutebieter gewore.
In ut Uesjtraotes vereinigingsleve bin ich geine onbekinde! Ich bin sinds mien 5e levensjaor bie de Scouting Den Bosco. Wha ich van lid, nao leiding en besjtuurlid bin doorgegreujd en nog altied actief.
Ich höb tot mien 18e bie de jeug en aansjletend nog ein paar jaor bie ut 3e van RKUVC gevoetbald. En bin auch jeugdleider gewaes en sinds ein paar jaor toegetrooje tot ut Engelandcommitee.
Ich bin inkele jaore bie de Jonkheid Bartholomeus Meersje lid gewaes.
En noe nog sjteeds lid van UK’98! Eine echte vereiniginsman mèt hart veur os dörp kin ich waal zègke!
Carneval belaef ich al mien ganse leve in mien Ulesjtraote! De tradities en activiteite die hie te doon zeen ving ich geweldig! Gezellig mèt vrung nao de Grwatte zitting of mèt miene carnevalsgroep de Struukedukers mèt loupe in de optocht! En de lètste tied auch same mèt mien vriendin Jill de carneval beleve ving ich fein. Al mèt al ving ich alles geweldig.
De keuze um bie de raod van 11 te goon is ein euverwoge keuze die ich same mèt mien vriendin Jill höb gemaak. Dit um de tradities van de carneval in Ulesjtraote te behouwe. En dit mèt de andere raod van elf lede, besjtuurslede en de werkgroep lede veurt te zette, um de jonger generaties auch hiejvan te laote blieve genete.
Veer goon dr eine geweldige tied mèt os alle van make!
Kuutebieters alaaf!
Ulesjtraote alaaf!
Tim
Ich bin Jill Bruls, gebore en getoge in Wienesroa. Carneval sjpeelt al van jongs aaf aan ein grwatte rol in mien leve. Ut is ech mèt de paplepel ingegote. In 2014-2015 bin ich jeugdprinses bie CV de Veldkretsers Wienesroa gewees, whadoor ich al vreug betrokke waor bie dit sjoene fjès. Vastelaovend beteikent veur mich veural plezeer make, saamhorigheid en ut viere mèt vrung en femilie! En vanaaf noe mèt CV de Kuutebieters en uch alle.
Veer höbbe same besjlote um bie de raod van 11 te goon um dr veur te zörge dat carneval in ut dörp blief besjtoon en um alle sjwan tradities veurt te zette!
Veer goon dr mèt os alle get sjwans van make.
Alaaf Ulesjtraote
Jill
